കത്തുപാട്ടുകള്‍ മാപ്പിളപാട്ടിലെ മണിമുത്തുകള്‍

കത്ത് പാട്ടുകള്‍ മാപ്പിളപാട്ടുകളില്‍ മുന്‍ കാലങ്ങളിലും ഉണ്ടായിരുന്നെങ്കിലും എഴുപതുകളില്‍ പ്രവാസ ജീവിതത്തിന്റെ വിഹ്വലതകളും നൊമ്പരങ്ങളും പകര്‍ത്തി കവിയും ഗായകനുമായ എസ് എ ജമീല്‍ രചിച്ച ദുബായ് കത്തുകളാണ് അനുവാചക ലോകം ഏറ്റു വാങ്ങിയത്.1973 ല്‍ അബുദാബിയിലെ മലയാളികളുടെ ആവശ്യപ്രകാരം ജമീല്‍ രചന നിര്‍വ്വഹിച്ചു അവതരിപ്പിച്ച 'എത്രയും ബഹുമാനപ്പെട്ട എന്റെ പ്രിയ ഭര്‍ത്താവ് '
എന്ന് തുടങ്ങുന്ന ഹൃദയ സ്പര്‍ശിയായ മനോഹര ഗാനം വളരെ ജനപ്രീതിയാര്‍ജ്ജിക്കുകയുണ്ടായി. അക്കാലത്ത് ഗള്‍ഫ് നാടുകളില്‍ ജോലി തേടി പോയിരുന്ന ഭര്‍ത്താക്കന്മാരെ പിരിഞ്ഞു വീട്ടില്‍ എകാന്തരായി കഴിയേണ്ടി വന്ന ഏറനാടന്‍ പെണ്‍കൊടിമാരുടെ മോഹങ്ങളും മോഹഭംഗങ്ങളും വൈകാരികത ഒട്ടും ചോര്‍ന്നു പോകാതെ ഈ ഗാനത്തില്‍ ചിത്രീകരിച്ചിരിക്കുന്നു. ഈ പാട്ടിനു ഗള്‍ഫ് മലയാളികള്‍ക്കിടയിലും മലബാറിലും ലഭിച്ച വന്‍ തോതിലുള്ള സ്വീകാര്യത കണ്ടു മറുപടി കത്ത് പാട്ടായ 'അബുദാബിയിലുള്ളോരെഴുത്തു പെട്ടി '

എന്ന മറ്റൊരു ഗാനം കൂടി ജമീല്‍ എഴുതുകയുണ്ടായി.ഈ രണ്ടു കത്തുപാട്ടുകളും ഹിറ്റുകളായി മാറിയതോടെ ഈ വിഭാഗത്തില്‍ പെട്ട നിരവധി പാട്ടുകളും രചിക്കപ്പെട്ടു.'കരളിന്റെ കരളായ ' 'ഏറെ പിരിശത്താലെ ' തുടങ്ങിയ ഇവയില്‍ പെടുന്നു. ഇവയെല്ലാം എഴുപതുകളില്‍ അരങ്ങ് തകര്‍ത്ത ഗാനമേളകളിലും മറ്റും അവതരിക്കപ്പെട്ടു.അങ്ങിനെ മാപ്പിളപാട്ടുകളിലെ മണിമുത്തുകളായി കത്ത് പാട്ടുകള്‍ മാറി.